Focus op de toekomst

Nr. 3 Remco Vrinzen

E-mail: remcovrinzen@cdaroerdalen.nl
 

Daag Luuj,
Ich bön Remco Vrinzen, 22 jaor en al dae tied höb ich in Berg gewoond. Wiejer bön ich aafgesjtudeerd Politicoloog en sjtudent Rechte aan de Radboud Universiteit en wèrk ich in de weekende biej Tuincentrum Daniëls. Maar es g’r de luuj die mich kinne zouwt vraoge waat noe ech typisch is aan mich, den zalle ze uch zigke det ich eemös bön dae doordrèngk is van de Limburgse cultuur en det dae det mit sjtols ouch oetdreug. Cultuur is namelik waat ós verbindjt, en waat ós verbindjt zörg d’r veur det veer nao ein blieve omkieke en get euver höbbe veur ein. 
 
Det is den ouch metein waat ich in ’t biejzönjer wil óngersjteune in dees gemeinte. De Limburgse cultuur, mit daobiej de Limburgse taal, deent ein prominentere rol te kriege. Es se die cultuur wils behaaje mós se biej de jeug zeen. Det zeen de toekomstige sjötte op ’t OLS, de träöters van de hermenie en de sjrievers van vastelaovesleedjes. Zo zörg se d’r veur det de jeug verbónje is mit de omgaeving en zich dao ouch veur wilt inzètte. 
 
Maar om de jeug hiej te haaje is extra inzèt neudig. Ich wil mich hel make veur ein Roerdale det de jeug binne oós grenze kint haaje door dees gemeinte aantrèkkelik te blieve make en zodet ze dalik ouch ein huuske kinne vinje in dees sjoon gemeinte. Det verdeent extra aandach, in eine tied van eine krappe boewmert en ein sjtudieleensjtelsel, van eemös dae zelf oet de jeug kömp en wit waat daoveur belangeriek is.
 
Dees twee elemènte, cultuur en jeug, zalle den ouch de óngerwèrpe zeen wo ich in ’t biejzönjer mien aandach aan zal besjtaeje. 
 
Zeent geer veur ein Limburgs Roerdale wo ouch de jeug óngerdeil van kint blieve oetmake? Sjtöm den 16 Meert op Remco Vrinzen veur ein nuuj en fris geluid in de Raod!